ចំនេះដឹងទូទៅ: February 2012

Sunday, February 12, 2012

ភាសានិងអត្ថន័យរបស់ផ្កា

តាម ធម្មតាបុរស ឬយុវជនដែលមានសុជីវធម៌ ត្រូវតែជូនផ្កាដល់នារីឱ្យបានញឹកញយនៅពេលបុណ្យទាន ថៃ្ងខួបកំណើត ឬពិធីជប់លៀងផ្សេងៗ ដើម្បីជាសក្ខីភាពឱ្យនារីយល់ដឹងពីជម្រៅទឹកចិត្តរបស់ខ្លួន ។ ក៏ប៉ុន្តែការយកបាច់ផ្កាទៅជូននារីមិនមែនចេះតែទិញពីផ្សារកាន់យក ទៅជូនឱ្យតែរួចពីដៃនោះទេ ព្រោះបុប្ផានីមួយៗសុទ្ធតែមានន័យទៅតាមប្រភេទរបស់វា ហេតុដូច្នេះហើយបុរស និងយុវជនគប្បីយល់ដឹងពីអត្ថន័យ ឬក៏ភាសារបស់បុប្ផា មុននឹងយកទៅជូននារីណាម្នាក់ដែលខ្លួនពេញចិត្ត ហើយក៏ដើម្បីឱ្យនារីនោះយល់ដឹងពីទឹកចិត្តរបស់ខ្លួនផងដែរ ។
បើដូច្នោះបុរស និងនារីគួរតែស្វែងយល់ឱ្យបានដឹងច្បាស់ពីភាសារបស់បុប្ផា មុននឹងយកទៅជូនគេ ឬក៏ទទួលយកបុប្ផាដែលគេជូនដល់ខ្លួន ។ បុប្ផាដែលរៀបរាប់នៅខាងក្រោមនេះមានភាគច្រើនដែលដាំដុះ នៅក្នុងប្រទេសកម្ពុជារបស់យើង ហើយខ្លះទៀតមានតែនៅបរទេសទេ តែរូបរាងនិងភិនភាគរបស់ផ្កាទាំងនោះស្រដៀងនឹងផ្កាដែលដុះនៅ ស្រុកយើងដែរ ដែលសមល្មមនឹងយកអត្ថន័យរបស់បុប្ផាទាំងនោះមកជំនួសឱ្យផ្កាដែលដុះ ក្នុងស្រុកខ្មែរយើងវិញ ព្រោះថាបើដាក់ឈ្មោះជាភាសាបរទេសនាំឱ្យពិបាកយល់ ហើយយើងក៏ពុំធ្លាប់ស្គាល់ផង ។

ចំពោះផ្កាកុលាបមានច្រើន ពណ៌ ច្រើនបែប ហើយគេរមែងចូលចិត្តគ្រប់ៗគ្នា សូមអញ្ជើញបុរស និង យុវជនទាំងឡាយយកផ្កាកុលាប ឬក៏ផ្កាអ្វីដែលខ្លួនចូលចិត្ត ហើយមានន័យដ៏ជ្រាលជ្រៅធំធេងទៅជូននារីដែលយើងស្រឡាញ់ពិតជាមិនខុស បំណងប្រាថ្នាឡើយ ។
ផ្កាកុលាបតែងតំណាងឱ្យសេចក្តីស្នេហា និងសោភ័ណភាពរូបសម្ផស្សរបស់នារី ។
- ផ្កាកុលាបវល្លិដែលដុះវារឡើងទ្រើង ពណ៌ស ឬផ្កាឈូក = សេចក្តីសង្ឃឹម
- ផ្កាកុលាបពណ៌ស = ស្នេហាយ៉ាងស្ងប់សា្ងត់
- ផ្កាកុលាបពណ៌ក្រហម = រូបសម្ផស្សស្រស់ត្រកាល
- ផ្កាកុលាបពណ៌ផ្កាឈូក = រូបសម្ផស្សនៅតែក្មេងខ្ចី ស្រស់ល្អជានិច្ច
- ផ្កាកុលាបពណ៌លឿងខ្ចី = ចិត្តវៀចវេរមិនស្មោះត្រង់
- ផ្កាកុលាបពណ៌លឿងទុំ = សុភាពរាបសាគួរឱ្យស្រឡាញ់
- ផ្កាកុលាបដុះនៅក្នុងព្រៃ = រូបសម្ផស្សល្អតែចិត្តសាវា
- ផ្កាកុលាបពណ៌កាំម្ញី (ពណ៌ក្រហមក្រមៅ) = ស្នេហាយ៉ាងឆ្កួតវង្វេងត្រេកត្រអាល
- ផ្កាកុលាបក្រពុំ (ទោះជាពណ៌អ្វីក៏ដោយ) = តំណាងឱ្យនារីក្រមុំព្រហ្មចារី
- ផ្កាកុលាបដែលរុះរោយ = តំណាងឱ្យរូបសម្ផស្សដែលរុះរោយបាត់បង់សោភ័ណភាព
- ផ្កាម៉ោងដប់ = ចូលចិត្តឱ្យគេស្រឡាញ់ ឬចូលចិត្តតុបតែងខ្លួន
- ផ្កាប៉ៃលិន = ក្តីស្រមៃតែឯងឯកា
- ផ្កាក្រដាស = ចិត្តជាប់ជំពាក់ស្នេហ៍
- ផ្កាសេប៉ារា = សេចក្តីស្នេហាដ៏ទន់ភ្លន់ផ្អែមល្ហែម
- ផ្កាឈូក = ក្តីស្នេហ៍ដ៏បរិសុទ្ធជាទីសក្ការៈ
- ផ្ការំចង់ = ព្រងើយកន្តើយ
- ផ្កាចន្ធូ = ក្តីស្នេហ៍ដែលមានអានុភាពដ៏អស្ចារ្យ ក្តីបរិសុទ្ធឥតវៀចវេរ
- ផ្កាម្លិះ = មានសមានចិត្តយ៉ាងត្រេកត្រអាល
- ផ្កាឈូករ័ត្ន = ស្នេហាអមតៈ
- ផ្កាត្របែកព្រៃ = ភក្តីភាពក្នុងអពមង្គល និងអស់សង្ឃឹម
- ផ្កាណាគ្រី = សុភមង្គល
- ផ្កាសារិកា = កុំភ្លេចខ្ញុំ
- ផ្កាកោ្ងក = ច្របូកច្របល់មិនច្បាស់លាស់
- ផ្កាស្នោ = មិត្តភាពយូរអង្វែង
- ផ្កាទូលីបពណ៌លឿង = ស្នេហាអស់សង្ឃឹម
- ផ្កាទូលីបពណ៌ក្រហម = សារភាពសេចក្តីស្នេហា
- ផ្កាដង្កូវ = ចិត្តកំណាញ់ចង្អៀតចង្អល់
- ផ្កាវីយ៉ូឡែត = ស្នេហាលាក់ទុកក្នុងចិត្ត
- ផ្កាគគីរ = ស្នេហាពិតប្រាកដជាក់លាក់ចង់បានធ្វើជាគូអនាគត
- ផ្កាព្រីង = គួរប្រុងប្រយ័ត្ន
- ផ្កាត្រកួន = នឹកក្រែងរអែងចិត្ត
- ផ្កាអ៊ូ (មានស្លឹកពណ៌បៃតងព័ទ្ធជុំវិញ ស្លឹកពណ៌ក្រហមនៅកណ្តាល) = គ្មានមេត្តា
- ផ្កាអើយ៉េ = ស្នេហាយ៉ាងស្និទ្ធស្នាល
- ផ្កាក្រចកដៃ = ប្រកបដោយសមានចិត្ត
- ផ្កាមាលតី = ក្តីស្រឡាញ់ដែលបែងចែកឱ្យអ្នកដទៃ
- ផ្កាដាលីយ៉ា = ចងចាំដឹងគុណមិនភ្លេច
- ដើមព្រះខ្លប = ស្អប់ខ្ពើមច្រណែននិន្ទា
- ដើមមុខសេះ (ជ័រសម្រាប់លាបដំបៅ) = ព្រួយបារម្ភ
- ដើមកន្ទុយដំរី = កាន់ទុក្ខ ចូលរួមរំលែកទុក្ខ
- ដើមធ្មៃ ក្រចៅ = អំពើល្អដែលមិនសាបសូន្យ - មែកអូលីវ = តំណាងឱ្យសន្តិភាព
- ផ្កានួនស្រី = ស្នេហាអៀនប្រៀន
- ផ្កាយីហ៊ុប = ស្នេហាអៀនប្រៀន ចិត្តនៅតែស្នេហ៍ជារៀងរហូត
- ផ្កាស្បៃរឿង = ភ្លើងស្នេហ៍ឆាបឆួល
- ផ្កាដកខឹម = ចិត្តមានះរឹងរូស
- ផ្កាចំប៉ា = នឹកខ្ញុំកុំភ្លេចណា៎ !
- ផ្កាចំប៉ី = អនុស្សាវរីយ៍មិនអាចបំភ្លេចបាន
ដកស្រង់ចេញពីគេហទំព័រ chanbokeo.com

ផ្លែឈើ ១៣ ប្រភេទដែលចាស់បុរាណមានជំនឿថាមិនល្អ សម្រាប់ប្រគេនព្រះសង្ឃ

ជំនឿអរូបិយមួយ បានធ្វើឲ្យចាស់បុរាណកាន់សាសនាព្រះពុទ្ធភាគច្រើន ជឿថា ប្រសិនបើអ្នកចង់ធ្វើពិធីបុណ្យសុំសេចក្តីសុខចម្រើន សម្រាប់ឈានចូលឆ្នាំថ្មី ដើម្បីឲ្យរកស៊ីមានបាន ផ្លែឈើ ១៣ ប្រភេទខាងក្រោមនេះ មិនត្រូវយកទៅប្រគេនព្រះសង្ឃជាដាច់ខាត។

   ១- ពុទ្រា
   គេមានជំនឿថា សមិទ្ធផលដែលកើតចេញពីការខិតខំប្រឹងប្រែង នឹងល្អតែក្នុងអំឡុងពេលដំបូងៗ បន្ទាប់ពីនោះមក ក៏ចេះតែធ្លាក់ចុះបរាជ័យ ប្រឹងយ៉ាងណាក៏មិនទៅមុខរួច។
   ២- ផ្លែស្ពឺ
   គេមានជំនឿថា នឹងកើតមានភាពអត្តខាត់ (ភាពខ្វះខាត, មិនសូវបរិបូណ៌) ផ្នែកណាមួយ ដូចជាវិស័យការងារ វិស័យហិរញ្ញវត្ថុ ឬ ប្រសិនបើអត្តខាត់ផ្នែកសេ្នហា គឺមិនអាចចែចង់អ្នកណាបានឡើយ ឬក៏ខូចចិត្តព្រោះសេ្នហាមិនបានសមបំណង។
   ៣- ផ្លែល្មុត
   គេមានជំនឿថា ស្នាដៃ ឬ សមិទ្ធផលដែលអ្នកខំប្រឹងប្រែង ត្រូវបានគេមើលរំលង ប្រឹងធ្វើល្អយ៉ាងណាក៏មិនទទួលបានលទ្ធផលដែរ។
   ៤- មង្ឃុត
   គេមានជំនឿថា សមិទ្ធផលដែលកើតចេញពីការខិតខំប្រឹងប្រែង នឹងដាច់ៗ រកេតរកូត គ្មានលក្ខណៈល្អឥតខ្ចោះ។
   ៥- ផ្លែភ្ញៀវ
   គេមានជំនឿថា សមិទ្ធផលដែលកើតចេញពីការខិតខំប្រឹងប្រែង ច្រើនតែមិនមានគុណភាព ពីព្រោះត្រូវធ្វើបែបប្រញាប់ប្រញាល់ ដូចមានភ្លើងដុតរោលគូទរាល់លើកយ៉ាងដូច្នោះ។
   ៦- ផ្លែទៀប
   គេមានជំនឿថា បើនឹងធ្វើកិច្ចការអ្វីមួយ តែងមានឧបសគ្គមករារាំងរហូត ស្ទើរតែមិនបានដកដង្ហើមតែម្តង។
   ៧- ផ្លែលាំងសាត
   គេមានជំនឿថា ការងារដែលធ្វើនឹងមិនរលូនល្អ ចេះតែរាំងស្ទះ រហូតទាល់តែគួរឲ្យឈឺក្បាល។ លាំងសាត ជាឈ្មោះឈើមួយប្រភេទ ផ្លែជាប់គ្នារដឹកចេញពីស្មែងសម្បកផ្លែស្តើងសម្បុរ-ស សាច់ជាក្លែបៗដូចបង្គៅ តែជ្រាយជាងបង្គៅបន្តិច មានរសផ្អែមលាយជូរតិចៗ, បរិភោគបាន, គ្រាប់មានរសល្វីង។
   ៨- ផ្លែព្នៅ
   គេមានជំនឿថា មិនគ្រាន់តែធ្វើអ្វីមិនទទួលបានលទ្ធផលល្អទេ ប៉ុន្តែថែមទាំងមានគេគ្រវីក្បាលដាក់ ពីព្រោះសមិទ្ធផលកើតចេញពីការខិតខំ មិនចូលភ្នែកគណៈកម្មការសោះ។
   ៩- ផ្លែខ្វិត
   គេមានជំនឿថា មិនគួរយកផ្លែខ្វិតទៅប្រគេនព្រះសង្ឃទេ បើមិនដូច្នេះទេ ឧបករណ៍រកស៊ីទាំងឡាយនឹងបាត់បង់ ខ្វះនេះខ្វះនោះរហូត។
   ១០- ផ្លែចាក
   គេមានជំនឿថា ទោះបីជាបានសមិទ្ធផលល្អ ប៉ុន្តែមិនស្ថិតស្ថេរឡើយ អាចត្រូវគេដណ្តើមយក ឬមួយមិត្តភក្តិក្នុងក្រុមឈ្លោះទាស់ទែងគ្នា រហូតទាល់តែបែកខ្ញែកគ្នា។
   ១១- ផ្លែទម្លាប់
   គេមានជំនឿថា សមិទ្ធផលដែលកើតចេញពីការខិតខំប្រឹងប្រែង នឹងត្រូវគេត្រាំដាក់ថតតុ ក្លាយទៅជាកាកសំណល់ហ្វូស៊ីលទៅអនាគត។
   ១២- ផ្លែសេដា
   គេមានជំនឿថា ទោះបីជាជីវិតមិនមានរឿងអ្វីឲ្យចំបែងចិត្តក្តី ប៉ុន្តែមិនដឹងហេតុអ្វីបានជាគេចេះតែរួញរា ធុញទ្រាន់ ខ្ជិលធ្វើកិច្ចការទាំងអស់។
   ១៣- ផ្លែរកាំ
   គេមានជំនឿថា ជីវិតនឹងគ្រាំគ្រា រកាំចិត្ត ការងារដែលធ្វើនឹងបរាជ័យ អាចនិយាយបានថាមិនល្អតែម្តង៕
ដកស្រង់ចេញពីគេហទំព័រ រស្មីកម្ពុជា

Thursday, February 9, 2012

វីតាមីនសម្រាប់កុមារ: អ្វីដែលអ្នកម្តាយត្រូវយល់

តើកុមារដែលមានសុខភាពល្អត្រូវការវីតាមីនបន្ថែមដែរឬទេ?
បើសិនជាលោកអ្នកជឿតាមការប្រកាសផ្សាយព័ត៌មានផ្សេងៗ គ្រប់កុមារទាំងអស់សុទ្ធតែត្រូវការជារៀងរាល់ថ្ងៃនូវវីតាមីន Flintstone ឬ Gummy Bear ។ ក៏ប៉ុន្តែ តើការនោះពិតដែរឬទេ?
ពួកអ្នកជំនាញបានឯកភាពគ្នាថា វាមិនមែនសុទ្ធតែចាំបាច់ទាំងអស់ នោះទេ។ យកល្អគេត្រូវផ្តល់វីតាមីនទៅឲ្យកុមារតាមរយ:របបហូបចុកដែល មានការថ្លឹងថ្លែងល្អ និងមានសុខភាព(a balanced and healthy diet) ដែលរួមមាន:
-    ទឹកដោះនិងផលិតផលទឹកដោះ ដូចជាហ្វ្រូម៉ាសនិងទឹកដោះជូរ yoghurt (យកល្អគឺផលិតផលដែលមានជាតិខ្លាញ់តិចតួច ចំពោះកុមារដែលមានអាយុលើសពី៣ឆ្នាំ)
-    ផ្លែឈើនិងបន្លែស្រស់សន្លឹកខៀវឲ្យបានច្រើន (គឺមានទាំងខាត់ណាbroccoli និងស្ពៃspinach ដែលកូនអ្នកមិនចូលចិត្តផងដែរ)
-    ប្រូតេអ៊ីនដូចជាមាន់ ត្រី សាច់ និងស៊ុត
-    គ្រាប់ធញ្ញជាតិ ដូចជាអាហារធ្ចើពីស្រូវអ៊ក(oatmeal) និងបាយក្រហម(brown rice) ជាដើម។
តើកុមារបែបណាដែលត្រូវការវីតាមីនបន្ថែម?
មានមាតាបិតាជាច្រើនដែលមិនសូវមានពេល ព្រោះជាប់រវល់នឹងធ្វើការងារ ម្ល៉ោះហើយក៏មិនសូវមានពេលនឹងចំអិនចំណីអាហារនៅផ្ទះផងដែរ។ ដោយហេតុនោះ គ្រូពេទ្យអាចឲ្យយោបល់ឲ្យផ្តល់វីតាមីនចម្រុះ(multivitamin) ឬជាតិរ៉ែ(mineral) បន្ថែមក្នុង១ថ្ងៃៗ ឲ្យកុមារមួយចំនួនដូចតទៅៈ
-    កុមារដែលហូបអាហារមិនទៀងទាត់ពេលវេលា មិនមានការថ្លឹងថ្លែងល្អ មិនស្រស់ មិនពេញលេញ
-    កុមារដែលរើសចំណី ហើយហូបមិនបានគ្រប់គ្រាន់
-     កុមារដែលមានស្ថានភាពវេជ្ជសាស្ត្ររ៉ាំរ៉ៃ (chronic medical conditions)ដូចជាកើតហឺត (asthma) ឬមានបញ្ហាក្នុងការរំលាយអាហារ(digestive problems) ជាពិសេសនៅពេលណា ដែលគេប្រើឱសថ (សូមពិភាក្សាជាមួយនឹងគ្រូពេទ្យរបស់កុមារសិន មុននឹងចាប់ផ្តើមឲ្យវីតា មីនបន្ថែម ក្នុងពេលដែលកូនរបស់លោកអ្នកកំពុងតែប្រើឱសថណាមួយ)
-    កុមារដែលសកម្ម កំពុងតែលេងកីឡា
-     កុមារដែលហូបចំណីអាហាររៀបចំឡើងលឿនៗ(fast foods) ចំណីអាហារងាយៗ (convenient foods) និងចំណីអាហារកញ្ចប់(processed foods)
-    កុមារដែលស្ថិតក្នុងតំណមឲ្យហូបតែបន្លែ(vegetarian diet) (ពួកនេះអាចត្រូវការជាតិដែក បន្ថែម) តមអាហារជាតិទឹកដោះ (dairy-free diet) (គេអាចត្រូវការជាតិកាល់ស្យ៉ូមបន្ថែម) ឬ តមចំណីមួយចំនួនទៀត
-    កុមារដែលផឹកទឹកសូដាមានជាតិកាបូណាតច្រើន ដែលអាចច្រោះយកវីតាមីននិងជាតិរ៉ែពីក្នុងខ្លួនទៅបាន។
វីតាមីននិងជាតិរ៉ែចម្បងៗចំនួន៦សម្រាប់កុមារ
តាមលំដាប់អក្សរឡាតាំង ក្នុងនោះមួយចំនួនមានសារៈសំខាន់ខ្លាំងដល់ការលូតលាស់របស់កុមារ។
-     វីតាមីនអា ជួយធ្វើឲ្យកុមារមានការលូតលាស់និងអភិវឌ្ឍន៍ល្អធម្មតា។ ជួយក្នុងការជួសជុលជាលិកានិងឆ្អឹង។ ជួយធ្វើឲ្យស្បែកនិងភ្នែកមានសុខភាពល្អ និងបង្កើនភាពស៊ាំឬអ៊ីមុយនីតេ។ ប្រភពល្អៗមានទឹកដោះ ហ្វ្រូម៉ាស ស៊ុត និងបន្លែដែលមានពណ៌លឿងឬទឹកក្រូច ដូចជាការ៉ុត ដំឡូងជ្វាជាដើម។
-    វីតាមីនបេ ក្រុមវីតាមីនបេ គឺបេ២ បេ៣ បេ៦ និងបេ១២ ជួយដល់ការធ្វើមេតាបូលីស ការបញ្ចេញថាមពល និងដំណើរការប្រព័ន្ធឈាមរត់និងប្រព័ន្ធខួរក្បាលប្រកបទៅដោយសុខភាព ។ ប្រភពល្អៗមានសាច់ មាន់ ត្រី គ្រាប់ផ្លែឈើ(nuts) ស៊ុត ទឹកដោះ ហ្វ្រូម៉ាស សណ្តែកbeans និងសណ្តែកសៀង(soybeans) ។
-    វីតាមីនសេ ជួយធ្វើឲ្យសាច់ដុំ ជាលិកាតភ្ជាប់ និងស្បែកមានសុខភាពល្អ។ ប្រភពល្អៗរួមមានផ្លែឈើមានជាតិជូរ ផ្លែstrawberries, ផ្លែkiwi ប៉េងប៉ោះ និងបន្លែពណ៌បៃតងដូចជាខាត់ណា broccoli ជាដើម ។
-    វីតាមីនដេ ជួយដល់ការកកើតឆ្អឹងនិងធ្មេញ និងដល់ការស្រូបយកជាតិកាល់ស្យូមរបស់រាងកាយ។ ប្រភពល្អៗមានទឹកដោះ ហ្វ្រូម៉ាស និងទឹកដោះជូរyoghurt (ជាពិសេសគឺផលិតផលទឹកដោះដែលមានជាតិទឹកដោះច្រើន fortified dairy products) សាច់លឿងរបស់ស៊ុត(egg yolks) និងប្រេងត្រី(fish oil) ។
-    ជាតិកាល់ស្យូម ជួយធ្វើឲ្យឆ្អឹងរឹងមាំ នៅក្នុងពេលដែលកុមារកំពុងតែលូតលាស់។ ប្រភពល្អៗមានទឹកដោះ ហ្វ្រូម៉ាស និងទឹកដោះជូរyoghurt តៅហ៊ូ (tofu) និងទឹកក្រូចមានជាតិកាល់ស្យូម (calcium-fortified juice) ។
-    ជាតិដែក ជួយដល់ការលូតលាស់សាច់ដុំ និងមានសារៈសំខាន់ចំពោះសុខភាពរបស់កោសិកាឈាមក្រហម។ ច្រើនមានកង្វះជាតិដែកនៅក្នុងយុវវ័យ ជាពិសេសចំពោះយុវនារី នៅពេលដែលចាប់ផ្តើមមានលោហិតរដូវ។ ប្រភពល្អៗមានសាច់គោនិងសាច់មានពណ៌ក្រហម មាន់បារាំង សាច់ជ្រូក spinach និងសណ្តែក ។
ការឲ្យវីតាមីនក្នុងកម្រិតច្រើនពេក(megavitamins) មិនល្អទេចំពោះកុមារ។ វីតាមីនដែលរលាយក្នុងខ្លាញ់ (មានវីតាមីនអា ដេ អឺ និងកា) អាចទៅជាពុលបានកាលណាកុមារទទួលក្នុងកម្រិតច្រើនខ្លាំងពេក។ ដូចគ្នាដែរចំពោះជាតិដែក។
សូមហូបចំណីអាហារស្រស់ ដើម្បីឲ្យមានវីតាមីនល្អ
សុខភាពល្អរបស់កូនចាប់ផ្តើមជាមួយនឹងអ្វីដែលអ្នកទិញដាក់ចូលក្នុងរទេះរុញ ចេញពីហាងលក់ទំនិញមក។
អាហារូបត្ថម្ភដែលល្អចាប់ផ្តើមជាមួយនឹងការប្រើប្រាស់នូវចំណីអាហារ ស្រស់ៗ ប្លែកៗ ឲ្យបានច្រើនតាមដែលអាចធ្វើទៅបាន។ វាល្អជាងការផ្តល់ឲ្យនូវអាហាររៀបចំឡើងលឿនៗ(fast foods) ឬចំណីអាហារងាយៗ (convenient foods) ឆ្ងាយខ្លាំងណាស់ ម្យ៉ាងទៀតការផ្តល់ឲ្យកុមារនូវវីតាមីនក៏អាចនឹងមានផលមិនល្អទៅលើ អាហារូបត្ថម្ភវិញ ផងដែរ។ មានវីតាមីននិងជាតិរ៉ែជាច្រើននៅក្នុងចំណីអាហារដែលមានកាបូអ៊ី ដ្រាតខ្ពស់និងប្រូតេអ៊ីន (មិនមែននៅក្នុងខ្លាញ់ទេ)។ ហើយចំណីអាហារដែលមានវីតាមីនច្រើនជាងគេគឺផ្លែឈើនិងបន្លែស្រស់។
ដើម្បីផ្តល់វីតាមីនឲ្យបានច្រើនទៅកុមារ សូមផ្តល់ចំណីអាហារឲ្យបានប្លែកៗ មិនមែនគ្រាន់តែឲ្យៗបានច្រើននោះទេ។ សព្វថ្ងៃនេះ មានកុមារជាងពាក់កណ្តាលទៅហើយដែលធាត់ខ្លាំង(overweight) គឺច្រើនជាងកាលពីពីរទស្សវត្សមុន នេះគឺមកពីចំណែកនៃចំណីអាហារដែលកុមារទទួលទានវាស្មើនឹង១ភាគ៤ទៅ ១ភាគ៣នៃចំណីអាហាររបស់មនុស្សចាស់។
យកល្អត្រូវផ្តល់ចំណីច្រើននិងប្លែកៗ នៅក្នុងពេលហូបបាយនិងការស្រស់ស្រូប ក្នុងចំនួនតិចតួច តែឲ្យញឹកញាប់ ក្នុងមួយថ្ងៃៗ។ បើកូនរបស់លោកអ្នកមិនបានញ៉ាំចំណីអាហារពិសេសណាមួយ ដូចជាបន្លែ ចំនួនពីឬបីថ្ងៃមកហើយ នោះក៏មិនជាអ្វីដែរ ក៏ប៉ុន្តែសូមដាក់បញ្ចូលវាមកវិញពីរបីថ្ងៃបន្ទាប់មក តែត្រូវរៀបចំវាជាមុខម្ហូបផ្សេងវិញ។ អ្វីដែលគេហៅថាជា បាតុកម្មចំណីអាហារ(food strikes)៉របស់កុមារ អាចនឹងចប់ទៅវិញ ដោយឯងៗ។
វីតាមីន និង កុមារដែលមានសុខភាពល្អ: ចំណុចគន្លឹះ៥យ៉ាង
បើសិនជាលោកអ្នកត្រូវផ្តល់វីតាមីនទៅឲ្យកូនរបស់លោកអ្នក សូមអនុវត្តតាមចំណុចគន្លឹះទាំងអស់នេះ:
១ សូមទុកដាក់វីតាមីនឲ្យផុតពីដៃរបស់កូនក្មេង ដើម្បីកុំឲ្យវាយកញ៉ាំដូចជាស្ករគ្រាប់។
២ សូមកុំចាប់បង្ខំកូនឲ្យទទួលទានចំណីអាហារ ឬប្រើប្រាស់បង្អែមដើម្បីសូកប៉ាន់ឲ្យកូនញ៉ាំឲ្យច្រើនឲ្យសោះ។ ផ្ទុយទៅវិញ សូមសាកល្បងឲ្យវីតាមីនដែលអាចបៀមបាន បន្ទាប់ពីហូបបាយរួច។ វីតាមីនដែលរលាយក្នុងខ្លាញ់អាចត្រូវបានស្រូបចូលទៅក្នុងឈាមតាម ចំណីអាហារ។
៣ បើសិនជាកូនរបស់លោកអ្នកកំពុងតែប្រើឱសថណាមួយ សូមកុំភ្លេចសួរគ្រូពេទ្យសិនក្រែងឱសថនោះមានប្រតិកម្មអ្វីមកលើ វីតាមីនឬជាតិរ៉ែ។ បើត្រូវឲ្យវីតាមីនបន្ថែម ការផ្តល់នោះមិនត្រូវធ្វើឲ្យកម្រិតប្រើឱសថកើនឡើងឬថយចុះនោះទេ។
៤ បើសិនជាកូនរបស់លោកអ្នកមានការពិបាកក្នុងការលេបវីតាមីនគ្រាប់ ឬទឹក សូមរកវីតាមីនក្រោមទម្រង់បៀមឲ្យវិញ។
៥ សូមរង់ចាំឲ្យកូនមានអាយុពេញគ្រប់៤ឆ្នាំសិន សឹមពិចារណាផ្តល់វីតាមីនចម្រុះទៅឲ្យ លើកលែងតែមានការឲ្យយោបល់ពីគ្រូពេទ្យ។
អាហារូបត្ថម្ភពេញលេញនិងមានការថ្លឹងថ្លែងល្អមានតួនាទីសំខាន់ណាស់ សម្រាប់ការសិក្សានិងអភិវឌ្ឍរបស់បុត្រធិតាលោកអ្នក។ ហេតុនេះ សូមយកចិត្តទុកដាក់ក្នុងការរៀបចំចំណីអាហារប្រកបទៅដោយសុខភាពល្អឲ្យ បានប្លែកៗសម្រាប់កូនលោកអ្នកបើសិនជាអាចធ្វើទៅបាន នោះវាប្រសើរជាងការដែលរំពឹងតែទៅលើវីតាមីនដែលគេដាក់លក់។
ដកស្រង់ចេញពី health.com.kh

តើការញ៉ាំត្រីធ្វើឱ្យទារកកាន់តែឆ្លាតមែនឬ?

ថ្មីៗនេះមានការតឿនរំឭក ជាច្រើនសម្រាប់ស្ត្រីមានផ្ទៃពោះក្នុងការជៀសវាងការបរិភោគសាច់ត្រី មួយចំនួនដើម្បីការពារពីការពុលជាតិបារត ។ ត្រីឆ្លាម ត្រីដាវ (swordfish) និងត្រីស្បៃកា គឺជាត្រីដែលគួរជៀសវាង ព្រោះវាមានផ្ទុកជាតិបារតខ្ពស់ដែលអាចបំផ្លាញខួរក្បាលបាន។ ជាទូទៅ ស្ត្រីមានផ្ទៃពោះត្រូវបានណែនៃឱ្យទទួលទានត្រីដែលមានបារតទាបតែ ពីរដងប៉ុណ្ណោះក្នុងមួយសប្តាហ៍ ប៉ុន្តែការតឿនរំឭកទាំងនេះអាចធ្វើឱ្យស្ត្រីញ៉ាំសាច់ត្រីកាន់តែ តិច។
ផ្ទុយទៅវិញ មានភស្តុតាងដែលបង្ហាញថាអាស៊ីតខ្លាញ់ក្នុងត្រីអាចជួយការលូតលាស់នៃ ខួរក្បាលរបស់ទារកមុនពេលកើត។ ត្រង់នេះហើយដែលបញ្ហាបានកើតឡើង។ ការញ៉ាំសាច់ត្រីច្រើនអ្នកអាចមានគ្រោះថ្នាក់ដោយសារពុលជាតិបារត។ តែបើញ៉ាំសាច់ត្រីតិចអ្នកអាចនឹងបង្អត់ជាតិអាស៊ីតខ្លាញ់សម្រាប់ ការលូតលាស់នៃខួរក្បាល ដែលជាជាតិខ្លាញ់ដែលធ្វើឱ្យកូនរបស់អ្នកឆ្លាតជាងមុន។
អាស៊ីត docosahexaenoic (DHA) ដែលជាប្រភេទនៃអាស៊ីតខ្លាញ់អូមេហ្គា ៣ គឺជាអាស៊ីតខ្លាញ់ធំបំផុតដែលមានក្នុងសាច់ត្រី ហើយវាចាំបាច់សម្រាប់ការលូតលាស់នៃខួរក្បាល។ អ្នកជំនាញផ្នែកសារធាតុបំប៉នមួយចំនួនណែនាំឱ្យស្ត្រីមានផ្ទៃពោះទទួល DHA តាមរយៈការញ៉ាំថ្នាំបន្ថែម។
ដកស្រង់ចេញពី health.com.kh

Make snow

Sunday, February 12, 2012

ភាសានិងអត្ថន័យរបស់ផ្កា

ផ្លែឈើ ១៣ ប្រភេទ​ដែល​ចាស់​បុរាណ​មានជំនឿថា​មិនល្អ សម្រាប់​ប្រគេន​ព្រះសង្ឃ​

Thursday, February 9, 2012

វីតាមីន​សម្រាប់​កុមារ​:​ អ្វី​ដែល​អ្នក​ម្តាយ​ត្រូវ​យល់​

តើ​ការ​ញ៉ាំ​ត្រី​ធ្វើឱ្យ​ទារក​កាន់តែ​ឆ្លាត​មែនឬ​?

ផ្លែឈើ ១៣ ប្រភេទដែលចាស់បុរាណមានជំនឿថាមិនល្អ សម្រាប់ប្រគេនព្រះសង្ឃ

វីតាមីនសម្រាប់កុមារ: អ្វីដែលអ្នកម្តាយត្រូវយល់

តើការញ៉ាំត្រីធ្វើឱ្យទារកកាន់តែឆ្លាតមែនឬ?